NAZIOARTEKO MONETA FUNTSA: ZOAZTE PIKUTARA! (1)

Nazioarteko Moneta Funtsak bere enegarren formula itxura bakarrekoa zerbitzatu digu, eta oraingoan soldaten %10ko murrizketa aldarrikatzen du, zertarako den oso garbi ez dudalarik. NMFk hitz egiten duenean -berdin dio bozemalearen nortasunak- soldata huts batetik bizi garenok dardaran jartzen gara.  Erakunde ponpoxo hori zertara dedikatzen den  hilkorretako gehienok oraindik ez dakigula, gorriak eta bi pairatzera kondenatzen gaitu gutaz gogoratzen denean eta gure aldetik arnasa hartu besterik nahi ez dugun guztietan.

Albiste kezkagarri hori iritsi zaigun egun berean, beste berri ekonomiko batek agerian utzi ditu espainiar enpresa handien trikimailuak ahalik eta zergarik gutxien ordaintzeko. Horrela jakin izan dugu Elkarteen Zergarengatik korporazio boteretsuek ordaindu beharko zuketenetik %10 bakarrik egiten dutela. Hau da, % 3 aplikatzen diete euren irabaziei. Gainerakoa euren patriketan geratzen da. Espainiar enpresa guztiek Ogasunera ordaindutakoaren bataz bestea %8' 8 bide da, bost urte lehenago %19 zenean. 

Bien bitartean IRPFrengatik sendiengandik ingresatzen dena errenta gordinaren %11' 9 da, hau da enpresen portzentaje baino handiagoa. 

NMFeko jaun andreok: zerbait ez dut ongi ulertzen. Datu objektibo horien aurrean ez al duzue enpresen konportamenduei buruz (gobernu sozialistaren eta peperoaren eskutik, hori bai) ezer argumentatu behar? Sinesgarritasun pittin bat gehiago emango zeniokete zeuen lanari.  Munduko ekonomiaren desoreka  gu ahulon sorbaldetan bakarrik kargatzen duzuen bitartean, bihotzez diotsuet: zoazte pikutara!

(1) Andra Mari Zuriaren jaia dugu gaur. Nik ere gai alaiagoa aukeratu ahalko nukeen nire zutaberako, ezta? Dena den, zorionak Zuriñe, Blanca, Edurne, Nieves… guztiei.

Argazkiak:

NMF: trebolia.com

Sarea: Tere Anda 

(

ATERA ZAITEZTE KALERA!

Iragan asteko albistegia beteta gertatu da hainbat eta hainbat berrirekin. Kolore anitzeko jazoerak izan dira eta hausnarketarako motibo asko eskaini dizkigun arren albiste batekin geratzen naiz.

Francisco Aita Santuak Brasilera buruturiko bidaiak lerro ugari idazteko bidea eman du. Munduko Gazteriaren Topaketak izan dira Rion eta duela bi urte Madrilen Benedicto XVIren agindupean egindakoekin alderatu nahi izan dut. Bi diskurtso guztiz diferenteak izan direlakoan nago. Duela gutxi idatzi nuen Francisco oraindik inkognita bat dugula. Denbora behar da edozeinen  aktibo eta pasiboa kritikatu  aurretik eta Vatikanoko oraingo buruari  denbora tarte bat utzi behar zaio, eliza katolikoa norantz daraman behar bezala  epaitzeko. 

 

Madrilen abortu eta eutanasiaren inguruko hitzak izan zituen Benedicto XVI.ak gazteentzat. Franciscok, berriz, gazteei euren elizbarrutiak iraultzea eskatu zien, kalera ateratzea eta elizaren zimenduak astintzea. "Eliza ez bada kalera agertzen ONG bilakatzeko arriskutan dago" azaldu zien.

 

Kalera atera behar du elizak, bai, bere aztura eta jantzi zaharkitu bezain ozpinduak ahaztuz. Kalera atera, zanpatuekin, baztertuekin, pobreekin eta gizakien zein herrien arteko elkartasunean sinesten dutenekin batera aritzeko. Hitzetatik egiteetara  igaro behar du elizak, ilunpeko praktika ustelgarrietatik urrun. Irakatsi behar du ereduarekin, premia material eta izpiritualean daudenei eskua luzatuz, injustiziak epelkeriarik gabe salatuz eta guztientzako elizaren ateak zabalduz.

 

"Bazter ditzagun elizan mundukeria, erosokeria eta klerikalismoa, eta goazen kalea iraultzera" planteatu zien Franciscok gazteei, zer entzuten ari ziren sinetsi ere ezin zuten gotzain eta egiturako pieza obsoletoen aurrean. Orain arte, bederen, itxaropenean ereiten ari da Jorge Mario Bergoglio. Jasoko al du uzta?

ERGELAK ALA GEZURREZKOAK

Ergelak dira ala gezurrezkoak ditugu. Zertaz ari naizen? Adibide argigarri bat jarriko dizuet eta konturatuko zaretelakoan nago. 

Behin -aspaldi, eta hain aspaldi!- enpresa mundu gordinean ari nintzen urteetan, beste zeregin batzuen artean diru beltzeko funts baten kudeaketa egokitu zitzaidan. Altzairuak irabazi handiak eragiten zituen artean eta dena ez zen garbia negozioan. Mahai azpiko ordainketak ohikoak genituen eta den-denok genekien horrela ibili behar zela merkatuan. Iluntasun hartako nire aurreneko operazioan diru kantitate bat eman behar izan nion bezero bati. Haren eskuetan sobrea jarri ondoren, nire inozokerian papertxo bat luzatu nion bezeroari bere sinadura eskatuz. Bai, egiaztatu nahi nuen nire eskuetatik ateratako sosak bere patrikara igaro izana. Horrela nire nagusiei operazioaren amaiera ona zuritu ahal izango niela uste nuen. 

Tipo haren erreakzioak, ordea, errealitatera eraman ninduen:  "zer diru eman didazu, bada?" Eta instantean ulertu nuen: diru beltza ez da existitzen, beltza izango bada.  

Nola arraio firmatuko zidan tipo hark ezer, baldin eta niri zegokidan lana dirua katakunbetako putzu ilunetan gordetzea baldin bazen? Izenpetzeak naturazko egiaztapena eman ziezaiokeen iruzurrari eta horixe bera ekidin behar nuen nire artapenean. 

Barcenasek "jaso nuen" sinatuak baldin baditu –“El Mundo” egunkariak azalerazi dituen moduan- despistaturen batek egin behar izan zituen halako hanka sartzeak, eta huts horiengatik nik  tipo horri gutxienez  bi zigor jarriko nizkioke: bata tranpak egiteagatik eta bigarrena ergel maiuskulua izateagatik. Eta gezurrezkoak -faltsuak- badira paper eta sinadurak Barcenasi bizi bitarteko hiru kondena emango nizkioke, atxilotik inoiz atera ezineko azpimarrarekin: aurrena lapur zikina dugulako, bigarrena gezurti konpultsiboa delako eta hirugarrena bera ezik gainerakook alu hutsak garela uste izan duelako. A! Edozein kasutan, paperak egiazkoak direla frogatuko balitz ere,  PPko diruzain ohiak, lehen bi arrazoiengatik, bizi guztirako zigor bana jasoko lituzke. Beraz, nire eskuetan balego, pepero ilustrea ez litzateke kartzelatik sekula irtengo. 

Oharra:  EAEko PPk ez du ezer frogatu, Barcenasen alderdiaren hemengo adarraren aurkako salaketa desaktibatzeko. Kontabilitate ofizialaren oreka besterik ez du erakutsi, gastu eta diru sarrerei dagokienez. Horixe bakarrik falta zitzaigun, A kontabilitean ere deskuadreak agertzea! Alde horretatik bide datoz Samper eta Quirogaren azken aitorpenak. Ohoretu egiten dituena.