UKITU DAITEKEEN ADISKIDETASUNA

 “Facebook bidez bakarrik ikusten zaitut!” aspaldi bat egiten ez genuen adiskide batek esan zidan lehengoan kalean. Haren adierazpenak pentsarazi zidan, lehenik eta behin baieztapena apur bat gehiegizkoa izan zitekeelako, eta gero ez dudalako uste ona denik harremana soilik birtuala izatea.

Badira norbanakoak facebooken ere ikusi nahi ez zenituzkeenak, eta derrigorrez pairatu behar dituzu. Baina sare sozialetako zirrikitu bihurrietatik zure etxeraino sartzen diren pertsona horiei mingaina atera diezaiekezu distantzia fisikotik, oraindik behintzat, birtualtasunak aukera ematen baitizu haiekiko deskontsiderazio pixka bat erakusteko, eta gainera auskalo non dauden teoriako lagun horiek mindu gabe. Atejoka datozen guztiak ez dituzu lagun.

Harreman birtuala, besterik gabe, ez zait osasuntsua iruditzen, nahiz eta askotan egoera zailetatik salbatzen zaituen, ez baitzara konprometitzen, nolabait esanda, beste aldean dagoenaren zamari eusteko jarrerara. Hala eta guztiz ere, begietara so egiten uzten ez duten harremanen gainetik, hotzak eta hutsalak izanagatik abandonuaren ataria direnak, nahiago dut praktikatzea, dei diezaiogun, ukipen-adiskidetasuna. Horrek lotailuak koipetzen ditu eta, finean, ibilaldia atseginagoa bilakatzen da.

Argazkia: JMVM

ITZULPEN BARREGARRIAK

Irakurtzen nuen lehengoan, nori beharrezkoak zaizkion hizkuntza guztietan berba egiteko gauza izango dela gizakia, etorkizun ez hain urrutian, buruan txip antzekoren bat ezarriz gero. Eta sinesten dut iragarpen horretan, gure gorputzak aldaera guztietarako gertu baitago, teknologiak ahalbidetzen dion neurrian. Zer munstro ekoiztuko dugun beste gauza bat da. 

Bien bitartean barre egiteari atxikiko natzaio, batez ere aplikazio informatikoek eskainitako itzulpen xelebreen aurrean, iragan astean euskarazko nire testutxo batek zerbitzatu zidana lekuko. Nik idatzi nuen Facebooken: 

“Ikusi genuen behin Arrasateko adandeyarzatarren zergatikakoa eta saga horren zenbait kideren nondik norakoak azaldu nituen. Gaur, batez ere, Mariano Adan de Yarza Gortazar hirugarren belaunaldiko pertsonaia ekarri nahi dut, agian sendi horretako ezagunena gure artean, herriko alkate izatera heldu baitzen”

Eta Facebookek itzuli zidan:
“Lo veo en un anterior adandeyarzatarren de arrasate zergatikakoa y esa saga kideren algunos detalles explicarlo en las rocas. Hoy, sobre todo, Mariano Adán de yarza munibe tercer traer el personaje de nueva generación, tal vez quiero más conocido de la familia de ese país entre nosotros, imposible llegar a tener alcalde” 

Bikaina iruditu zait azken esaeraren itzulpena. “Herriko alkate izatera heldu baitzen”etik “imposible llegar a tener alcalde”ra iritsi da. Islatuko al du diferentzia horrek euskaldun eta gazteleradunen arteko distantzia gaindiezina? Auskalo! (portzierto, Facebook: auskalo/búscalotik dator. Ez horregatik!)

Argazkiak: sensores.com