FIKZIO-ERREALITATEAN MURGILTZEN GARA

Banoa ulertzen, gutxi gora behera, zenbait pertsonaren buru-mekanismoaren nondik norakoa, datozen hauteskundeei begira. Osotasunean konprenitzea ezina bada ere gizaki horien joko zalantzagarri bezain deitoragarriak bide batzuk eskaintzen ditu ikerketan ez galtzeko, eta nork ondorioak -ez hain zalantzazkoak- atera ditzake ikertuen jarrerak sarrera bikoitzeko taula batera jaso ondoren. 

Ez diozula igartzen, irakurle preziatua, aurrekoarekin nora nahi dudan joan? Lasai, ahaleginduko naiz mezua argitzen! Badaukat, dena den, abantaila txiki bat zurekiko: idazten hasi naizeneko subjektu pasiboak ondo finkatuta nituen nire baitan. Orain pistatxo bat emango dizut: hartu azaroko hauteskundeetara “salbapatrias” moduan aurkezten direnak. Orain bai?... Ezetz oraindik? Begira, alderatu bi zutabetako lauki batean apirileko hauteskundeetan pertsonaia horiek ziotena eta datozenetarako bakoitzak agintzen duena. Orain samurrago, ezta?

Ezker eta eskuineko muturrak muturkerietan zintzilik, zentrokideei suposatzen zitzaien ahalmen handiagoa gobernu-lema eskuratu eta hiritarrok kai aproposera eramateko. Baina ematen du ez dakitela nola askatzen korapiloa, eta are txarrago oraindik, ez dutela askatzeko bat ere gogorik. Ezagutzen al duzu mundu aldrebeseko ipuina? Poliziak lapurrek atxilotzen dituzte, arrantza-ontzietan baserritarrak enbarkatzen dira eta suhiltzaileek etxeak erretzen dituzte. Gidatzen gaituen politiko kasta honek, agintera heltzen denean, gu gizagaixook zukutzen gaituzte… gure botoari esker. Baina poltsikora eraman dezaketen diru apurraz gain, politikan ez dute tipo horiek zer irabazi, eszenategi faltsuko harien muturra dutenak baitira agintariak, eta politikoak panpina hutsak. Eta fikzio-errealitate horretan mugitzen gara etengabe. Orain bai? Ulergarri samarra, ezta?

ERRE ZAITEZ INFERNUAN!

Ez dut gogoratzen non harrapatu ninduen Franco jeneral erailaren heriotzako albisteak. Bai, ordea, non nengoen ehortzi zuten egunean: igandea zen, azaroaren 23, eta Uribarri Ganboako Txoisa jatetxean nire emaztearen urtebetetzea ospatzen ari ginen. Topa egin genuen diktadorearentzat betiko sutzarra eskatuz. Une haietan inportanteena ez zen non lurreratzen ari ziren, hil zela baizik.

Berrogeita lau urteren buruan, eta trantsizio amaitu gabeko ibilbide malkartsu bezain etsigarrian goazela, gauzak « ondo lotuta » utzi zituen pizti haren gorpuzkinak tokiz aldatu dituzte, oroimen historikoaren liburuan puntu eta beste orrira pasa gintezkeela suposatuz. Baina gauzak ez dira hain errazak.

Sarraskilariaren heriotzako inflexio puntuan erreparazioetako balantzean hartzekodun zeinuarekin geundenok ez dugu lau hamarkada eta lau urteotan ezelako keinu baikorrik jaso, eta aurrerantzean ere berdin segituko dugulakoan nago. Batzuetan ematen du galtzaile hutsak izateko jaio ginela. Motxila horrekin bizi beharko dut, beharbada, baina munduko fusil guztiek ere ez didate isilaraziko, azaroaren 23 urruti hartan oihukatu genuena: Franco erre zaitez infernuan!

KOMETAREKIN BUELTAKA

Hastapenetara itzultzea edo bizi arteko errutina. Horrela muga genezake malko ibar honetan zeharreko gizakion ibilaldia. Unetxo batez atzera begira jarriko bagina hainbat eta hainbat bizipen biderkatu egin direla egiaztatuko genuke. Tamaina handi zein txikikoak izan, zikloak nabarmenak izan daitezke, jazotzen ari zaigun eta ukitzen ari garenari erreparatuz gero.

Ohitura zaharrak, ahanzturaren arasetan galdutako zaletasunak, bizio ezkutuak... ezer gutxi gertatzen zaigu berri adinaren eskaileratik gora goazen neurrian. Dena daukagu inbentatua. Ezerk ez gaitu ezustean harrapatzen. Baina urteen poderioz erreakziorako ahalmena kamustu egiten da, herdoildu. Hori ere frogatuta daukat.

Umea nintzela kometaren jolasa nuen atsegin. Tarte luzexka batean gordeta egon ondoren ostera berpiztu zen asti-ematea nire seme alaben ondoan. Eta antzerako beste ziklo baten ostean hementxe naukazue biloba eta euren lagunekin jolasteko nire burua prestatzen ari. Barruan zerbaitek diost  trebetasuna galdu dudala, baina gogotsu ekin diot erronka berriari.

Argazkia: Zuriñe 

ZEIN JUSTIZIA MOTA APLIKATU ZAIE?

Ez naiz originala izango baina nik ere txanda eskatzen dut Altsasuko gazteen kontrako epaia salatzeko eta espainiar justiziak despistatuta naukala adierazteko. Aurrekoarekin nahikoa liteke twitterreko kultura buru kamustailean ohituta daudenentzat baina niri gorputzak gehiago eskatzen dit eta ez naiz isilduko. 

Justiziaren mekanismoek beste norabait begiratzen dutela, Tejero terroristari omenezko bazkarirekin oparitzen zaion uneetan; zenbait alderdi politikotako kide miserableek -demokraziak (?) ahalbidetutako aukerari esker- diktadore sarraskilariari askatasun osoz kantu higuingarriak eskaintzen dizkioten egunetan; diktadore horren oinordeko batek guardia zibilen kontra erasotzeagatik kartzelatik libratzen den orduetan; ... datorrela Jainkoa eta esan diezagula zein justizia mota aplikatu zaien altsasutarrei.

Badakit ez naizela bat ere orijinala izan. Barkatu.

Argazkia: mesecosicas.blogspot.com